Útgáfufrétt: Paper Stories

Silvia Hufnagel

15 maí 2023

Fyrir fáeinum vikum kom út bók okkar Paper Stories – Paper and Book History in Early Modern Europe. Bókin byggir á ráðstefnu sem við skipulögðum í tengslum við fyrra rannsóknarverkefni okkar, Hringrás pappírs, og var haldin (eftir miklar covid-frestanir) í Reykjavík í maí síðastliðnum. Við eru sérlega ánægðar að geta boðið þetta ráðstefnurit í opnum aðgangi.

Þetta ritrýnda rit er skipulagt í kringum þrjú þemu sem byggja á æviferli bóka, handrita og fornbréfa. Fyrsta þematengdi þráðurinn liggur í gegnum pappírsframleiðslu, annar snýr að framleiðslu bóka og handrita og sá þriðji lýtur að viðskiptum, viðskiptum og eignarhaldi á mununum sem texti er letraður á. Í inngangi lýsum við (ritstjórarnir þrír) nálgun okkar á sögu pappírs og bóka og æviferilgreiningu muna.

Í fyrsta hlutanum um pappírsframleiðslu er að finna fimm kafla um komu pappírsins til Íslands, um samspil þróunar pappírs og stjórnsýslu og um efniviðinn í prentpappír 16. og 17. aldar, um þýska pappírsvél sem líkti eftir handgerðum pappír og um vatnsmerkjalýsingar í prentuðum og rafrænum vatnsmerkjaskrám.

Annar hlutinn um bóka- og handritaframleiðslu er saman settur úr fjórum köflum. Þar má lesa um hvaða áhrif pappírinn hafði á snið og stærð írskra handrita, um þær nákvæmu upplýsingar um stað og tíma handritaframleiðslu sem afla má með greiningu vatnsmerkja, um margvísleg söguleg, efnisleg og forvörsluleg sjónarhorn á elstu prentuðu bókina í Noregi, og um áhrif veðurfars, þar með talið eldgosa á Íslandi, á pappírsframleiðslu og prentun á Englandi á 18. öld.

Þriðji hlutinn lýtur að verslun, viðskiptum og eignarhaldi á handritum og bókum og geymir hann eina grein um þá sem versluðu með bækur í Evrópu snemma á 15. öld og sex greinar þar sem Ísland er í forgrunni. Þessar greinar fjalla um tengslanet skrifara og framleiðslu sautjándu aldar skrifara og myndlýsanda, um notkun og endurnotkun pappírs, um ritmálstengda tilurð og miðlun á nornaveiðum, um pappírsþjófnað, um leiðirnar og mynstrin sem koma í ljós þegar skoðað er hvernig pappírs var aflað á 19. öld, og un líkindin milli líffræðilegs fjölbreytileika og menningarlegs fjölbreytileika í íslenskum ljóðahandritum.

Í eftirmála má lesa um ljóðrænar viðtökur pappírsins á Íslandi árnýjaldar.

Við vonum að þið njótið lestrarins!

Heimildir:

Silvia Hufnagel, Þórunn Sigurðardóttir and Davíð Ólafsson, eds., Paper Stories – Paper and Book History in Early Modern Europe. Material Text Cultures 38. Berlin: De Gruyter, 2023. https://doi.org/10.1515/9783111162768